अरुंद जागेत धोकादायक आकाशी पाळणा “नगरपालिकेच्या परवानगीवर नागरिकांचे गंभीर सवाल” परभणी प्रतिनिधी:- रमेश मुलगीर
मानवत शहरात ऐन गर्दीच्या आणि अरुंद जागेत धोकादायक पद्धतीने आकाशी पाळणा उभारण्यात आल्याचा प्रकार समोर आला आहे. सुरक्षेचे कोणतेही ठोस उपाय न योजता थेट नागरिकांच्या जीवाशी खेळ मांडणाऱ्या या पाळण्याला नगरपालिकेने परवानगी कशी दिली, असा संतप्त सवाल आता स्थानिक नागरिकांमधून विचारला जात आहे.
मिळालेल्या माहितीनुसार, शहरात सध्या जत्रेचे किंवा प्रदर्शनाचे वातावरण असताना एका अरुंद जागेत मोठा आकाशी पाळणा (Giant Wheel) उभारण्यात आला आहे. या ठिकाणी होणारी भाविक व नागरिकांची अफाट गर्दी, आजूबाजूला असणारी विजेची ताणलेली तारे व दुकाने यामुळे अपघाताची मोठी शक्यता नाकारता येत नाही. सुरक्षेच्या दृष्टीने अत्यंत संवेदनशील असलेल्या या जागेवर एवढा मोठा पाळणा उभारताना आवश्यक त्या परवानग्या आणि ‘एनओसी’ (NOC) तपासल्या गेल्या आहेत का, असा प्रश्न उपस्थित होत आहे.
एखादी दुर्दैवी घटना घडल्यास याला जबाबदार कोण? असा थेट सवाल नागरिक करत असून, नगरपरिषदेच्या प्रशासकीय कारभारावर आणि निष्काळजीपणावर गंभीर प्रश्नचिन्ह निर्माण झाले आहे. कोणतीही जीवितहानी होण्यापूर्वी नगरपालिकेने व संबंधित प्रशासनाने तातडीने या बाबीची दखल घेऊन सुरक्षेची पाहणी करावी आणि योग्य ती कारवाई करावी, अशी जोरदार मागणी मानवतकरांमधून केली जात आहे.
About The Author
