पाच हजारांची मदत नको, शेतकऱ्यांना हक्काची भरपाई द्या!’ दुष्काळग्रस्त शेतकऱ्यांना दिवाळीपूर्वी जाहीर केलेल्या अग्रीम मदतीच्या निर्णयाचा निषेध; विविध शेतकरी संघटनांचे पैठण तहसीलदारांना निवेदन

पैठण अविनाश गर्डे

दुष्काळ आणि अतिवृष्टीच्या तडाख्याने आर्थिक संकटात सापडलेल्या शेतकऱ्यांना दिवाळीपूर्वी केवळ पाच हजार रुपये अग्रीम मदत देण्याच्या शासनाच्या निर्णयाविरोधात शेतकरी संघटना आक्रमक झाल्या आहेत. ‘पाच हजारांत शेतीचा खर्च कसा भागणार? घोषणा नकोत, शेतकऱ्यांना हक्काची मदत द्या!’ असा सवाल उपस्थित करत विविध शेतकरी संघटनांच्या पदाधिकाऱ्यांनी या निर्णयाचा तीव्र निषेध नोंदवला. यासंदर्भात पैठणच्या तहसीलदारांना निवेदन देऊन शेतकऱ्यांना भरीव आर्थिक मदत देण्याची मागणी करण्यात आली.

——————————————
नुकसान मोठे, मदत मात्र तुटपुंजी!

पैठण तालुक्यासह विविध भागांत अतिवृष्टी आणि दुष्काळसदृश परिस्थितीमुळे शेतीचे मोठे नुकसान झाले आहे. पिकांची हानी, वाढता उत्पादन खर्च, डोक्यावरचे कर्ज आणि महागाई यामुळे शेतकरी आर्थिक संकटाच्या खाईत लोटला गेला आहे. अशा परिस्थितीत दिवाळीपूर्वी शेतकऱ्यांच्या खात्यात पाच हजार रुपये अग्रीम मदत जमा करण्याची घोषणा करण्यात आली आहे.

मात्र, शेतीचा वाढता खर्च आणि प्रत्यक्ष झालेल्या नुकसानीचा विचार करता पाच हजार रुपयांची मदत अत्यंत अपुरी असल्याची भूमिका संघटनांनी मांडली. शेतकऱ्यांच्या नुकसानीच्या तुलनेत ही रक्कम म्हणजे जखमेवर मीठ चोळण्यासारखी असल्याची भावना निवेदनातून व्यक्त करण्यात आली. शासनाने या निर्णयाचा पुनर्विचार करून शेतकऱ्यांना त्यांच्या नुकसानीच्या प्रमाणात भरीव मदत द्यावी, अशी मागणी करण्यात आली.
—————————————–
शेतकऱ्यांच्या प्रमुख मागण्या

निवेदनाद्वारे शासनाकडे पुढील मागण्या करण्यात आल्या आहेत.

– दुष्काळग्रस्त शेतकऱ्यांसाठी दिवाळीपूर्वी भरीव आर्थिक मदत जाहीर करून तिचे प्रत्यक्ष वाटप करावे.
– नमो शेतकरी महासन्मान निधी योजनेतील पात्र लाभार्थ्यांचे प्रलंबित हप्ते तातडीने वितरित करावेत.
– पाच हजार रुपयांची तुटपुंजी अग्रीम मदत देण्याऐवजी प्रत्यक्ष पीक नुकसानीच्या प्रमाणात पुरेशी आर्थिक मदत द्यावी.
– शेतकऱ्यांना दिलासा देण्यासाठी शासनाने तातडीने ठोस निर्णय घ्यावा.
—————————————–
‘घोषणा नकोत, हक्काची मदत द्या!’

निवेदन सादर करताना उपस्थित शेतकरी आणि संघटनांच्या पदाधिकाऱ्यांनी शासनाच्या निर्णयाविरोधात घोषणाबाजी केली. ‘घोषणा नकोत, हक्काची मदत द्या!’ आणि ‘शेतकरी एकजुटीचा विजय असो!’ अशा घोषणांनी परिसर दणाणून गेला. दिवाळीच्या तोंडावर आर्थिक विवंचनेत असलेल्या शेतकऱ्यांना केवळ आश्वासनांऐवजी प्रत्यक्ष आर्थिक मदत मिळावी, अशी ठाम भूमिका यावेळी मांडण्यात आली.
—————————————–
विविध संघटनांचे पदाधिकारी उपस्थित

या निवेदनावर छावा क्रांतिवीर सेनेचे प्रदेश सरचिटणीस अनिल राऊत, स्वाभिमानी शेतकरी संघटनेचे माऊली मुळे, छावा संघटनेचे साईनाथ कर्डिले, रामेश्वर बावने, भगवान सोरमारे, सुभाषराव नवथर, महेश पवार, बाळासाहेब काळे, धनंजय गिरी, लक्ष्मण धरम, संजय करंगळ आणि संतोष एडके यांच्यासह अनेक शेतकऱ्यांच्या स्वाक्षऱ्या आहेत.

शेतकऱ्यांचे नुकसान आणि आर्थिक संकट लक्षात घेऊन शासनाने दिवाळीपूर्वी भरीव मदत प्रत्यक्ष खात्यात जमा करावी, अन्यथा शेतकऱ्यांच्या रोषाला सामोरे जावे लागेल, असा इशारा या निवेदनातून देण्यात आला आहे.